കാപ്പ നിയമപ്രകാരം തടങ്കലിലാക്കപ്പെട്ടവരുടെ കേസുകൾ ഉപദേശക ബോർഡ് അവലോകനം ചെയ്യുന്നു. തടങ്കലിലാക്കപ്പെട്ടവർക്ക് എതിരെയുള്ള തെളിവുകൾ പരിശോധിക്കുകയും അവരുടെ അഭിഭാഷകരെയും നേരിൽ കേൾക്കുകയും ബന്ധപ്പെട്ട വിവരങ്ങൾ പരിശോധിക്കുകയും ചെയ്യുന്ന നടപടികളിലൂടെയാണ് അവലോകനം നടത്തുന്നത്.

മേൽപ്രകാരമുള്ള വിശകലനത്തിൻ്റെ അടിസ്ഥാനത്തിൽ ഉപദേശക ബോർഡ് കാപ്പ നിയമപ്രകാരമുള്ള തടങ്കൽ തുടരണമോ വേണ്ടയോ എന്നതിൽ ശിപാർശ സർക്കാരിന് സമർപ്പിക്കുന്നു. മതിയായ കരണങ്ങളുണ്ടെന്നു കണ്ടെത്തുന്നതിന്റെ അടിസ്ഥാനത്തിലാണ് ഉപദേശക ബോർഡ് ശുപാർശ സമർപ്പിക്കുന്നത്.

നിലവിലുള്ള സാചര്യങ്ങളുടെ അടിസ്ഥാനത്തിൽ തടങ്കൽ ന്യായീകരിക്കത്തക്കതാണോ എന്ന് ആനുകാലിക അവലോകനങ്ങൾ സമിതി നടത്തുന്നു. കാപ്പ നിയമ പ്രകാരം ഔപചാരിക കേസ് ചാർജുകൾ ഒന്നും ചെയ്യാതെ തന്നെ വ്യക്തികളെ ഒരു വർഷത്തേക്ക് തടങ്കലിൽ ശിക്ഷിക്കുന്നതിനും, അതിന്റെ കാലം ദീർഘിപ്പിക്കുന്നതിനും വ്യവസ്ഥ ചെയ്തിട്ടുള്ളതിനാൽ ഇത്തരം അവലോകനം അനിവാര്യമാണ്.

കാപ്പ നിയമവുമായി ബന്ധപ്പെട്ട വിഷയങ്ങളിൽ സംസ്ഥാന സർക്കാരിന് മാർഗ്ഗനിർദ്ദേശങ്ങളും നിയമോപദേശവും ഉപദേശക ബോർഡ് ലഭ്യമാക്കുന്നു. ഇതിൽ നിയമത്തിലെ വ്യവസ്ഥകളുടെ വ്യാഖ്യാനം, നിയമപരമായ നടപടികളുടെ സ്പഷ്‌ടീകരണം, നിയമത്തിന്റെ ഭേദഗതികൾക്കുള്ള ശിപാർശകൾ എന്നിവ ഉൾപ്പെടുന്നു.