വകുപ്പ് 3 (1) - റഫറൻസ് കേസുകൾ:

കുപ്രസിദ്ധനായ ഗുണ്ടയെയോ റൗഡിയെയോ തടങ്കലിൽ വയ്ക്കുന്നതിന് സ്പോൺസറിംഗ് അധികാരിയായ ജില്ലാ പോലീസ് മേധാവി തടങ്കൽ ഉത്തരവ് പുറപ്പെടുവിക്കുന്നതിനു ചുമതലപ്പെടുത്തിയിട്ടുള്ള ജില്ലാ മജിസ്‌ട്രേറ്റ് & ജില്ലാ കളക്ടർക്ക് ശിപാർശ സമർപ്പിക്കുന്നു. പ്രസ്തുത ശിപാർശ പരിശോധിച്ച് ജില്ലാ മജിസ്‌ട്രേറ്റ് & ജില്ലാ കളക്ടർ തടങ്കൽ ഉത്തരവ് പുറപ്പെടുവിക്കുകയും ആയത് സർക്കാരിനും സംസ്ഥാന പോലീസ് മേധാവിക്കും (ഡയറക്ടർ ജനറൽ ഓഫ് പോലീസ്) റിപ്പോർട്ട് ചെയ്യുന്നതുമാണ്. ആയതു സംബന്ധിച്ച സാഹചര്യം സർക്കാർ കാപ്പ ഉപദേശക ബോർഡിന് മുൻപാകെ സമർപ്പിക്കുന്നു. ഈ റഫറൻസ് കാപ്പ ഉപദേശക ബോർഡ് പരിശോധിച്ച് ആവശ്യമായ രേഖകൾ വരുത്തുകയും ആവശ്യമെങ്കിൽ ഹിയറിംഗ് നടത്തുകയും ചെയ്തശേഷം സർക്കാരിന് റിപ്പോർട്ട് സമർപ്പിക്കുന്നു. പ്രസ്തുത റിപ്പോർട്ട് പ്രകാരം തടങ്കലിനു മതിയായ കരണങ്ങളുണ്ടോ ഇല്ലയോ എന്ന് അറിയിക്കുകയും സർക്കാരിനോട് അതനുസരിച്ചു സ്ഥിരീകരണ ഉത്തരവിറക്കുന്നതിനോ വിടുതൽ ചെയ്യുന്നതിനോ ബോർഡ് ശിപാർശ ചെയ്യുന്നു.

വകുപ്പ് 15 (1) - ഒ.പി. കേസുകൾ:

കുപ്രസിദ്ധനായ ഗുണ്ടയെയോ റൗഡിയെയോ നാട് കടത്തുന്നതിനോ പ്രവേശനം നിയന്ത്രിക്കുന്നതിനോ സ്പോൺസറിംഗ് അധികാരിയായ ജില്ലാ പോലീസ് മേധാവി, നാടുകടത്തൽ ഉത്തരവിടുന്ന അധികാരിയായ ഡി.ഐ.ജി.(ഡെപ്യൂട്ടി ഇൻസ്‌പെക്ടർ ജനറൽ ഓഫ് പോലീസ്) യുടെ പദവിയിൽ കുറയാത്ത പോലീസ് അധികാരിക്കോ ജില്ലാ മജിസ്‌ട്രേട്ടിനോ ശിപാർശ സമർപ്പിക്കുന്നു. പ്രസ്തുത ശിപാർശ പരിശോധിച്ച് നാടുകടത്തൽ അധികാരി ഉത്തരവ് പുറപ്പെടുവിക്കുന്നു. പ്രസ്തുത ഉത്തരവിനെതിരെ ശിക്ഷിക്കപ്പെട്ട വ്യകതിക്കു ഉപദേശക ബോർഡിന് മുൻപാകെ പരാതി സമർപ്പിക്കാവുന്നതാണ്. മേൽ പരാതി ഉപദേശക ബോർഡ് പരിശോധിച്ച് ആവശ്യമെങ്കിൽ ഹിയറിംഗ് നടത്തിയതിനു ശേഷം പ്രസ്തുത നാടുകടത്തൽ ഉത്തരവ് ഭേദഗതി വരുത്തുകയോ, റദ്ദാക്കുകയോ, സ്ഥിരീകരിക്കുകയോ ചെയ്യുന്നതാണ്.